मधेशदृष्टि
रौतहट ।
ढुंगाले छोपेर काठ लुकाएर लैजाँदै गरेको अवस्थामा सशस्त्र प्रहरीले सालको गोलिया काठसहित ट्याक्टर नियन्त्रणमा लिएको छ ।
चन्द्रपुर नगरपालिका–३ को गैँडाटारबाट लोड गरेर वडा नम्बर १० बालचनपुर लैजाँदै गरेको अवस्थामा ना ४ त ८३६६ नम्बरको ट्याक्टर सशस्त प्रहरीको टोलीले नियन्त्रणमा लिएको हो ।
बालचनपुरका चिरानमिल सञ्चालक मुकेश साहले ५ थान सालको गोलिया ढुङ्गामुनि लुकाएर ट्याक्टरमा लैजाँदै गरेको सूचनाका आधारमा सन्तपुरस्थित सशस्त्र बेसको टोलीले बरामद गरेको हो ।
बरामद काठसहित ट्याक्टर डिभिजन वन कार्यालय चन्द्रनिगाहपुरमा बुझाइएको सशस्त्र प्रहरीले जनाएको छ । चालक चन्द्रपुर– १० का २३ वर्षीय फिरोज मन्सुरी पक्राउ परेको तथा ट्याक्टर धनी चिरान मिल सञ्चालक मुकेश साह सशस्त्र प्रहरी देख्नासाथ फरार भएको बताइएको छ ।
बरामद ५० क्युफिट सालको गोलिया काठ, ट्याक्टर, चालकलाई नियन्त्रणमा रहेको आवश्यक अनुसन्धान भइरहेको डिभिजन वन कार्यालय रौतहटका प्रमुख सुनील कर्णले जानकारी दिए ।
