सञ्जय मिश्रा
रौतहट ।
पूर्व पश्चिमराजमार्गसँग जोडिएको चन्द्रपुर नगरपालिकामा जंगली हात्तीको आक्रमणबाट महिलाको मृत्यु भएको छ । अरु २ जना घाइते भएका छन् । उद्धार गर्न गएका २ प्रहरीलाई समेत चोटपटक लागेको छ।
चन्द्रपुर–५ स्थित राजपैडाकी ५५ वर्षीया मनिया धामीको जंगली हात्तीको आक्रमणबाट मृत्यु भएको डिभिजन वन कार्यालय रौतहटका प्रमुख शैलेन्द्र कुमार मिश्रले बताए । शनिबार साँझ घाँस लिन चाँदी खोला पारी रामलाल वृन्दावन साझेदारी वनमा गएकी धामीको हात्तीको आक्रमणबाट घटनास्थलमै मृत्यु भएको मिश्रले जानकारी दिए ।
उनीसँगै घाँस लिन गएकी ५३ वर्षीय अघनिया देवी चौधरी र ६० वर्षीय पनावती देवी घाइते भएकी छन् । आज बिहान मात्र सेना प्रहरी वन कर्मचारी र स्थानीयको सहयोगमा मृतक महिलाको शव फेला पारेकाे इलाका प्रहरी कार्यालय चन्द्रनिगाहपुरका प्रमुख डिएसपी एकनारायण कोइरालाले बताए ।
